ქართული ენის დღის აღსანიშნავი საზეიმო ღონისძიება

ღონისძიების ფარგლებში სტამბოლში მოქმედი ქართული ენის შემსწავლელი კურსების მოსწავლეებმა დამსწრე საზოგადოებას წარუდგინეს მრავალფეროვანი კულტურული პროგრამა - ქართული პოლიფონიური კომპოზიციები შეასრულა სტამბოლის ქართული ხელოვნების სახლის ანსამბლმა, ღონისძიების მონაწილეებს ასევე ჰქონდათ შესაძლებლობა გაცნობოდნენ თურქეთში მოღვაწე კალიგრაფის, სელამი გუმუშის ნამუშევრებს. დიასპორული ორგანიზაციების მიერ გაიმართა ქართულ ენასთან დაკავშირებული თემატური გამოფენები.

დამსწრე საზოგადოებას სიტყვით მიმართა ქ.სტამბოლში საქართველოს გენერალურმა კონსულმა, ალექსანდრე ჯიშკარიანმა, რომელმაც განსაკუთრებული მადლობა გადაუხადა ღონისძიების ორგანიზატორებსა და მონაწილეებს, ასევე ისაუბრა ქართული ენის დაცვისა და პოპულარიზაციის მნიშვნელობაზე.

აღსანიშნავია, რომ „საკვირაო სკოლების მხარდაჭერის პროგრამის“ ფარგლებში, საქართველოს საგარეო საქმეთა სამინისტროს მხარდაჭერით, თურქეთის რესპუბლიკაში საქართველოს საელჩოსა და სტამბოლში გენერალური საკონსულოს ჩართულობით, ქ. სტამბოლში მოქმედ ასოციაციებს გადაეცათ ქართული ენისა და ლიტერატურის სახელმძღვანელოები.